Алматы облысында халықтың ұлттық рухын оятып, дархан даланы думанға бөлеген «Қымызмұрындық – 2026» фестивалі өз мәресіне жетті, деп хабарлайды Todayinfo ақпарат агенттігі. Биыл бұл мерекеге еліміздің түкпір-түкпірі мен алыс-жақын шет елдерден 35 мыңға жуық қонақ келді.
Мереке барысында Мыңжылқының төсін дүбірлеткен мың жылқының көрінісі жиналған көпшіліктің назарын өзіне ерекше аударды. Дүйім жұрттың жігерін жанып өткен бәйгеде екі жүзге жуық шабандоз бақ сынады. Жүлде қоры да қомақты болды: аламан бәйгенің жеңімпазы Jetour X70 FL Prestige автокөлігін, екінші орын 2,5 миллион теңге, үшінші орын 1 миллион теңге алды.
«Түйе палуан» жарысы да жанкүйерлер назарындағы басты бәсекелердің біріне айналды. «Қошқар көтеру» жарысын көпшілік қызыға тамашалады. Дәстүр бойынша қошқарды ең көп көтерген спортшы оны өз жүлдесі ретінде алды.
«Алыптар сайысында» қатысушылар найза лақтыру, темір шыбық ию, ауыр тасты көтеріп жүру, 100 келілік бөренемен жаттығу және 500 келілік арбаны сүйреу секілді акробатикалық тәсілдерді көрсетті. Сайыс жеңімпазы 1,5 миллион теңге бас жүлдені иеленді.
Негізгі жарыстардан бөлек фестивальде қол күресі, арқан тарту, тоғызқұмалақ, шахмат, қой қырқу және көшпелі өмірдің ажырамас бөлігіне айналған өзге де ұлттық сайыстар өткізілді. Қарқара жайлауында ұйымдастырылған бұл мереке ұлттық спорттың мерейін үстем етіп, қазақ халқының рухани құндылықтарын дәріптеген маңызды мәдени шара ретінде есте қалды.
