Qasqir_kz лақап атымен танымал блогердің үстінен іс қозғалғанын хабарлады

Әлеуметтік желіде Qasqir_kz лақап атымен танымал болған блогер Әли-Әскер Байғожин өзінің үстінен «ұсақ бұзақылық» бабы бойынша әкімшілік іс қозғалғанын хабарлады. Бұл туралы ол өз парақшасында мәлім етті,деп хабарлайды Todayinfo. Блогердің айтуынша, істің қозғалуына оның «Ганюшкино департаменті» атты сатиралық жанрдағы сериалдағы рөлі себеп болған. Аталған жобада ол құқық қорғау органдарының қызметкерлерін бейнелейтін кейіпкерді сомдаған.

«Қазір мені «ұсақ бұзақылық» бабы бойынша жауапкершілікке тартқалы жатыр. Оған себеп – менің «Ганюшкино департаменті» сериалындағы кейіпкерім. Сәкен, сен нағыз оңбаған екенсің. Өзiң қиял әлемінде өмір сүресің, ал сотталып жатқан мен», – деп жазды блогер әзіл-шыны аралас үндеуінде.

Айта кетейік, Әли-Әскер Байғожин – Алматыдағы Ұлттық қауіпсіздік комитеті академиясының түлегі. Ол Атырау облыстық ҰҚК департаментінде алты жыл қызмет атқарып, кейін қызметінен кеткен соң әлеуметтік желілерде сатиралық видеолар жариялай бастаған. Бейнероликтерінде күштік құрылым қызметкерлерінің күнделікті өмірін жеңіл әзілмен көрсетеді. Блогердің жұмысы әлеуметтік желі қолданушылары арасында үлкен танымалдыққа ие болғанымен, құқық қорғау органдары тарапынан пікірталас пен сыни көзқарасқа ұшырап отыр.