2026 жылғы 26 маусым неке қию үшін ең әдемі әрі сұранысқа ие күндердің бірі саналады. Осыған байланысты болашақ жас жұбайларға өтінішті алдын ала тапсыру ұсынылды, деп хабарлайды Todayinfo.kz «Азаматтарға арналған үкімет» мемлекеттік корпорациясына сілтеме жасап.
Некені тіркеу үшін құжаттарды таңдалған күнге дейін кемінде 15 күнтізбелік күн бұрын тапсыру қажет. Сондықтан 2026 жылғы 26 маусымда шаңырақ көтеруді жоспарлаған жұптар өтініштерін 11 маусымды қоса алғанда өткізіп үлгеруі тиіс.
26.06.2026 секілді ерекше сандық үйлесім дәстүрлі түрде қарым-қатынастарын заңдастырғысы келетін азаматтардың қызығушылығын тудырады. Сол себепті бұл күні неке тіркеуге сұраныс жоғары болуы мүмкін.
«Азаматтарға арналған үкімет» мемлекеттік корпорациясы құжат тапсыруды соңғы күндерге қалдырмауға кеңес береді. Бұл болашақ жас жұбайларға өздері қалаған күн мен уақытты таңдауға мүмкіндік береді.
