«Зейнетақысын туысы алып отырған»: Шымкентте қорқынышты жағдайда өмір сүріп жатқан тыл еңбеккерінің видеосы тарады

Шымкентте адам төзгісіз жағдайда өмір сүріп жатқан тыл еңбеккерінің видеосы әлеуметтік желіде тарады, деп хабарлайды Todayinfo. Қарт әйел Мария Пономарёваны еріктілер тауып алған. Оның тұрып жатқан жері лас, тарақандар қаптап кеткен. Қоғам белсенділерінің айтуынша, қарияның зейнетақысын сіңлісі алып, қарттар үйіне өткізбей отыр. тіпті жақында 9 мамыр Жеңіс күніне орай берілген медаль мен ақшаны да алып алған екен. Әкімдік сыйлықты Мария Пономарёваның өз қолына табыстамаған, яғни қарт кісінің қандай жағдайда өмір сүріп жатқанын барып көрмеген.

«Әкімдік не істеп отыр? Тыл еңбеккері Мария Пономарёваны қарттар үйіне орналастырыңыздар. Әжей хайуанның күйін кешіп отыр. Оның сіңлісінің оған жолауға да қақысы жоқ», - деді олар. ⠀

Әлеуметтік желі қолданушылары жергілікті билікке сын айтып, қарияның жағдайын жасауды талап етті. Жұмыспен қамту және әлеуметтік қорғау басқармасының өкілдері Мария Понамарёва қазіргі уақытта ведомствоға қарасты Әлеуметтік бейімделу орталығында екенін хабарлады. Басқарма өкілдері әйелді жуындырып, тамақтандырып, медициналық көмек беріп жатқандарын айтты.