Экологиялық акция 25 сәуірде өтіп, облыс бойынша 762 гектардан астам аумақ тазартылып, 2307 тоннадан астам қоқыс шығарылды. Сонымен қатар 21 мыңнан астам көшет отырғызылды. Аймақтық науқанды өткізу үшін 287 бірлік техника жұмылдырылды.
Ауқымды науқанның басты іс-шараларының бірі Қонаев қаласында ұйымдастырылды. Бердібек Соқпақбаев атындағы орталық саябақта Мемлекет басшысы Қасым-Жомарт Тоқаевтың қатысуымен телекөпір өтіп, 100 ағаш отырғызылды.
Экологиялық науқан облыстың бірнеше ауданын қамтыды. Іле ауданында акцияға 2093 адам қатысып, 1290 ағаш отырғызылып, 77,1 тонна қоқыс шығарылды. Талғар ауданында 600 көшет, ал Қарасай ауданында «Алтын-Таға» зауытының қолдауымен 1000 ағаш отырғызылып, сенбілікке 5000-нан астам адам жұмылдырылды.
Іс-шараға қоғам белсенділері, жастар ұйымдары, еріктілер, кәсіпкерлер және қала тұрғындары қатысты. Облыс әкімдігінің мәліметінше, мұндай акциялар тұрғындардың қоршаған ортаға деген жауапкершілігін арттырып, тазалық мәдениетін нығайтуға ықпал етеді.
Алматы облысында Президент бастамасымен жүзеге асырылып жатқан «Таза Қазақстан» бағдарламасы аясында жүйелі жұмыс жалғасуда. Биыл 28 ақпаннан 23 сәуірге дейін өңірде 697 іс-шара ұйымдастырылып, оған 344 мыңнан астам адам қатысты. Осы кезеңде 59 мыңнан астам ағаш отырғызылып, 1979 тонна қоқыс шығарылды.
2026–2030 жылдарға арналған жоспарға сәйкес, Алматы облысында жыл сайын шамамен 220 мың ағаш отырғызу жоспарлануда. Бүгінгі табиғатты қорғау іс-шаралары үкіметтік бастамалардың нақты нәтижелерін көрсетіп қана қоймай, қоғамның ортақ іс үшін біріге алатынын дәлелдейді.
