СҚО-да есірткі жасырумен айналысқан қыздар ұсталды

Солтүстік Қазақстан облысында полиция есірткі жасырумен айналысқан құрбыларды ұстады, деп хабарлады Polisia.kz. Петропавл қаласындағы Жұмысшы кентінде СҚО ПД есірткі қылмысына қарсы іс-қимыл басқармасының қызметкерлері синтетикалық есірткі таратты деген күдікпен Toyota RAV4-де отырған 2 әйелді ұстады. Оның бірі – 33 жастағы қала тұрғыны. Ол заңсыз жолмен ақша табудың соңы немен аяқталатынын жақсы білген. Себебі 2022 жылғы қыркүйекте оның күйеуі осындай қылмыс жасағаны үшін сотталып, қазір түрмеде жазасын өтеп жатыр. Toyota RAV4 көлігінің ішінде күдіктінің 36 жастағы құрбысы отырған. Ол да ұсталды. Әйелдерді және олардың тұрғылықты мекенжайын тінту кезінде 700 грамнан асатын ұнтақ тәрізді және кесектелген зат тәркіленді. Сараптама нәтижесі оның α-PvP (тұз) синтетикалық есірткі екенін көрсетті. Сондай-ақ есірткіні буып-түюге арналған материалдар да тәркіленді.

"Бұл дерек Қылмыстық кодекстің 297-бабы 3-бөлігі бойынша сотқа дейінгі тергеп-тексерулердің бірыңғай тізіліміне тіркелді. Бүгінде 33 жастағы қала тұрғыны қамауға алынды, тергеу жүріп жатыр. Күдіктілер бұл қылмыспен шамамен 4 ай айналысқан", – деді СҚО ПД ЕҚҚІҚБ басшысы Руслан Сапаров.

Полиция есірткіні аса ірі көлемде өткізгені үшін 10 жылдан 15 жылға дейін бас бостандығынан айыру жазасы қарастырылғанын ескертеді. Бұған дейін Павлодарда есірткі жасырған 19 жастағы жігіттің ұсталғаны хабарланған еді.