Өзбекстан президенті Шавкат Мирзиёев Қасым-Жомарт Тоқаевпен телефон арқылы сөйлесіп, Қазақстандағы жаңа Конституция жобасы бойынша өткен референдумның сәтті өтуімен құттықтады, деп хабарлайды Todayinfo ақпарат агенттігі.
Телефон арқылы сөйлесу барысында Өзбекстан басшысы референдум қорытындылары халықтың Тоқаев жүргізіп отырған ауқымды реформаларға деген зор сенімін білдіретінін атап өтті.
"Референдум нәтижелері Президент Қасым-Жомарт Тоқаевтың басшылығымен жүргізіліп жатқан ауқымды реформалардың халық сеніміне ие екенін айқын көрсетті", — деді Шавкат Мирзиёев.
Өз кезегінде Қасым-Жомарт Тоқаев Өзбекстан басшысына қолдауы және халықаралық ұйымдар құрамында байқаушылар миссиясын жібергені үшін алғысын білдірді. Мемлекет басшысының айтуынша, жаңа Конституция заман талабына сай және мемлекеттің тұрақты дамуын қамтамасыз етуге бағытталған.
Сонымен қатар, тараптар стратегиялық серіктестік пен одақтастық рухында нығайып келе жатқан қазақ-өзбек қатынастарының оң қарқында екенін жеткізді. Кездесу соңында президенттер өңірлік және халықаралық күн тәртібіндегі өзекті мәселелер бойынша пікір алмасып, алдағы кездесулер кестесін талқылады.
Фото: Ақорданың баспасөз қызметі
