Ресей елшісі: Қазақстанның үш қаласында жаңа ресейлік мектептер салынады

Ресей Қазақстанның Тараз, Қызылорда және Түркістан қалаларында жаңа мектептер салуды жоспарлап отыр. Бұл туралы Ресей Федерациясының Қазақстандағы елшісі Алексей Бородавкин «Россия 24» телеарнасына берген сұхбатында мәлімдеді, деп хабарлайды Todayinfo ақпарат агенттігі. Дипломаттың айтуынша, бұл екі ел арасындағы гуманитарлық ынтымақтастықты дамыту аясындағы маңызды қадамдардың бірі. Сонымен қатар, Ресейдің Омбы, Астрахань және Орынбор қалаларында қазақстандық мектептердің құрылысы басталады. Бұл – екіжақты келісім негізінде іске асатын жоба.

"Біз гуманитарлық саладағы білім беру бастамаларын жоғары қарқынмен іске асырып жатырмыз. Тараз, Қызылорда және Түркістан қалаларында ресейлік мектептердің құрылысы жоспарлануда", - деді елші.

Сондай-ақ, Алматы маңында дарынды балаларды анықтап, дамытуға бағытталған ресейлік «Сириус» білім беру орталығының филиалы ашылмақ. Алексей Бородавкин өз сөзінде Президент Қасым-Жомарт Тоқаевтың Мәскеуге жасаған сапарын жоғары бағалап, оны екі ел басшылары арасындағы «ерекше одақтастық пен терең жеке сенімнің көрінісі» деп атады. Ол екіжақты қарым-қатынасты тереңдететін стратегиялық серіктестік туралы декларацияның жай ғана құжат емес, нақты іс-қимыл жоспары екенін жеткізді. Сұхбат барысында АЭС салу мәселесі де қозғалды. Елшінің айтуынша, жақын арада станция құрылысы бойынша құжаттарға қол қойылып, Ресейдің мемлекеттік несие беру рәсімдері аяқталады. Соңында дипломат Президент Тоқаевтың Халықаралық орыс тілі ұйымын құру туралы бастамасының іске асырыла бастағанын атап өтіп, Қазақстандағы ресейлік отандастар ұйымдары мен Орыс православие шіркеуін екі ел арасындағы «гуманитарлық авангард» және этносаралық татулықтың негізі деп бағалады. Фото: Әлеуметтік желіден