Қала мэріне кандидат болған: қарулы топ бес адамды өлтіріп, үшеуін жарақаттады

Мексиканың Веракрус штатында қарулы шабуыл кезінде Тексистепек қаласының мэрі қызметіне үміткер, билеуші Morena партиясының кандидаты Есения Лара Гутьеррес қаза тапты, деп хабарлайды Todayinfo. Оқиға 12 мамыр кешкісін тікелей эфирде көрсетілген қоғамдық іс-шара кезінде орын алған. Шабуыл Есения Лара Гутьеррес көшеде тұрғындармен амандасып жүрген сәтте жасалған. Жергілікті биліктің мәліметінше, шабуыл салдарынан бес адам қаза тауып, тағы үшеуі жарақат алған. Веракрус штатының губернаторы Росио Нале Гарсияның хабарлауынша, көз жұмғандардың қатарында кандидаттың өзі, Хальтипан қаласының полиция қызметкері мен оның қызы, үгіт бригадасының белсендісі және мэрлікке үміткердің жеке күзетшісі бар. Губернатор қаза тапқандардың туыстарына көңіл айтып, тергеу басталғанын мәлімдеді. Сондай-ақ ол 1 маусымға жоспарланған сайлау өз мерзімінде өтетінін растады.

«Біз демократиялық процестерден бас тартпаймыз. Әрбір муниципалитет билік органдарын таңдау құқығына ие. Біз – заң аясында әрекет ететін үкіметпіз», – деді Росио Нале Гарсия.