Ақордада Қасым-Жомарт Тоқаев пен Израиль президенті Ицхак Герцог тар құрамда кездесу өткізді, деп хабарлайды Todayinfo ақпарат агенттігі.
Қасым-Жомарт Тоқаев Израиль көшбасшысын Қазақстанға ресми сапармен келгені үшін қарсы алып, 1992 жылдан бері екі ел арасындағы тығыз достық қарым-қатынасты атап өтті. Президент экономика және саясат саласындағы өзара ынтымақтастықтың маңызды нәтижелеріне тоқталды.
«Сіздің құрметті әкеңіз Хаим Герцог, бұрынғы Израиль Президенті, біздің елдер арасындағы қарым-қатынастың бас архитекторларының бірі болды. Біз 1992 жылдан бері өте тығыз, ерекше достық қарым-қатынасты сақтап келеміз. Экономика және саясат саласында айтарлықтай нәтижелерге қол жеткіздік. Қазақстан Ыбырайым келісімдеріне қосылу туралы шешім қабылдады. Бұл қадам Таяу Шығыс елдері мен Израиль арасындағы қарым-қатынасты тұрақтандыруға үлес қосуға дайын екенімізді білдіреді», — деді Қасым-Жомарт Тоқаев.
Ицхак Герцог Ақордада болу әкесінің жолын жалғастырудағы үлкен мәртебе екенін атап өтті. Ол Қазақстанның табиғаты мен мәдениетіне тәнті екенін жеткізіп, жоғары технологиялар саласындағы ынтымақтастықты дамытуға ниетті екенін білдірді. Израиль президенті Қазақстанның Ыбырайым келісімдеріне қосылу шешімін құптады.
