Қазақстан Президенті Қасым-Жомарт Тоқаев пен Өзбекстан Президенті Шавкат Мирзиёев Бұхарада бейресми кездесу өткізіп, екі ел үшін маңызды стратегиялық мәселелерді талқылады, деп хабарлайды Todayinfo ақпарат агенттігі.
Өзбекстан басшысы бұл келіссөздерден нақты нәтиже күтетінін атап өтіп, Қазақстанның өңірдегі тұрақтылықты сақтаудағы рөліне жоғары баға берді.
"Бүгінгі ашық кездесуіміз нақты практикалық нәтижелерге қол жеткізуге және өңірлік ынтымақтастықты одан әрі кеңейтуге септігін тигізеді. Біз бауырлас халықтарымыз арасындағы тату көршілік, стратегиялық серіктестік пен одақтастық қарым-қатынастарды нығайтудағы сіздің күш-жігеріңізді жоғары бағалаймыз", — деді Шавкат Мирзиёев.
Кездесу барысында тараптар сирек кездесетін металдарды өндіру, көлік-транзит әлеуетін арттыру, энергетика, IT және туризм салаларындағы ынтымақтастықты тереңдету мәселелеріне тоқталды.
Келіссөздер қорытындысы бойынша екі ел үкіметтері арасында сауда-экономикалық ынтымақтастықты дамыту жөніндегі жол картасын қабылдауға уағдаласты.
Фото: Әлеуметтік желіден
