Назым Қызайбайдың әкесіне берген серті орындалды: үшінші мәрте әлем чемпионы атанды (ВИДЕО)

Фото: Қазспорт Қазақстандық боксшы Назым Қызайбай Сербияда өткен әйелдер арасындағы әлем чемпионатында алтын медаль жеңіп алып, үш дүркін әлем чемпионы атанды,  деп хабарлайды Todayinfo ақпарат порталы. Жарыс алдында спортшы әкесінің хатын жариялап, жанкүйерлерін тебірентті. "Бізде бәрі жақсы, аман жүр жаным, ақ жол!" деген әкесінің аудиохабарламасына жауап ретінде Назым оған "Чемпион болып ораламын" деп уәде еткен.

"Рахмет, әке! Алла бұйыртса қызыңыз Чемпион болып келеді. Бәріне сәлем айтыңыз, тақымдарыңызды қысып, мен үшін дұғада болыңыздар!", – деп жазды Назым Қызайбай.

Айтқанындай, финалдық жекпе-жекте 48 келі салмақта қазақстандық спортшы Ресей боксшысы Юлия Чумгалакованы айқын басымдықпен жеңді. Бұл жетістігі үшін ол 100 мың доллар көлемінде сыйақыға ие болады. Мемлекет басшысы Қасым-Жомарт Тоқаев Назым Қызайбайды алғашқылардың бірі болып тарихи жеңісімен құттықтады.