«Хуторлықтардың кезекті қулығы»: Қылмыс жасаумен аты шыққан Хасанның туыстары билікті бопсалауға көшті

Фото: видео скриншот «Хуторлықтар» ОПГ басшысы атанып жүрген Хасан Қасымбаевқа қатысты сот процесі жалғасып жатыр. Бүгін үкім шығады. Айыпталушының туыстары президентке видеоүндеу жолдап, істің әділ қаралуын сұрады, деп хабарлайды Todayinfo.kz ақпарат агенттігі.

«Күйеуімнің еш кінәсі жоқ. Оны үйде үш баласы күтіп отыр. Егер әділ шешім шығармаса, дәл осы жерде өзімді өртеймін», - деді Қасымбаевтың жұбайы Зульфия Қасымбаева.

Еске салайық, 2021 жылы Қасымбаевтың нұсқауымен оның адамдар тобы ММА жаттықтырушысы Арман Алимовты ұрып-соғып, көлікке күштеп отырғызып әкеткен. Жолда және ашық далада оны бірнеше рет соққыға жыққан. Салдарынан Алимов ауыр жарақат алды. Айыптау қорытындысында Қасымбаев пен серіктері кәсіпкер Әріпжан Тәжиевті ұрып, аптека жұмысын жалғастыру үшін ақша талап еткені айтылды. Оны кафе ішінде соққыға жығып, 1 млн теңге беруге мәжбүрлеген. Хасан Қасымбаев 2024 жылғы қарашада қамауға алынған. Ол Талғарда атышулы төбелес пен Шерзат Болаттың өлімі ісіне байланысты жиі аталып жүр.