«Дала өрті ауылға жеткен»: Алматы облысында үш адам тірідей жанып кетті

Қарасай ауданы Тұрар ауылының маңында 30 тамыз күні сағат 15:50-де 30 гектар аумақта құрғақ шөп өртенді. Әлеуметтік желілерде өрт болған жерден үш адамның күйген мәйіті табылғаны туралы ақпарат тарады, деп хабарлайды Todayinfo. Алматы облысы төтенше жағдай департаментінің мәліметінше, құрғақ шөпте тұтанған от жалпы ауданы 531 шаршы метр болатын жеті саяжай үйін, алты шаруашылық құрылысты, Honda Civic маркалы автокөлікті, 132 шаршы метрлік шөп қора мен шаруа қожалығындағы қалқаны және 80 шаршы метрлік тұрғын үйді шарпыған. Бірінші өрт сөндіру бөлімшелері келген сәтте барлық құрылыс нысаны отқа оранған.

“Өртті сөндіруге Алматы облысы мен Алматы қаласының ТЖД, жергілікті атқарушы органдар және орман шаруашылығы қызметкерлерінен құралған шамамен 120 адам мен 25 техника жұмылдырылды. Жағдай ТЖМ-нің толық бақылауында. Өрт ошағын жою жұмыстары жалғасып жатыр”, – деп мәлімдеді Алматы облысы төтенше жағдай департаменті.

Ведомство өрт шыққан жерден үш адамның күйіп кеткен мәйіті табылғанын растады. Аталған факті бойынша сот-медициналық сараптама тағайындалды. Фото: Freepik