Бесқарағай ауданында жүзу бассейнінің құрылысы қарқынды жүргізілуде

Бесқарағай ауданында әлеуметтік нысандардың құрылысы қарқын алды. Қазіргі уақытта ауданда 3 Мәдениет үйі мен 11 медициналық мекеменің құрылысы жүргізілуде. Медициналық нысандардың негізгі жұмыстары толық аяқталып, құжаттандыру рәсімдері атқарылып жатыр. Жақын арада тұрғындардың игілігіне берілуі жоспарлануда, деп хабарлайды Todayinfo ақпараттық агенттігі. Сонымен қатар, «Ауыл – ел бесігі» бағдарламасы аясында жүзу бассейнінің құрылысы жалғасып жатыр. Қазіргі уақытта жұмыстардың 45 пайызы орындалған. Құрылыс мердігерлері нысанды биылғы жылдың соңына дейін аяқтап, пайдалануға беруді көздеп отыр. Аудан тұрғындары үшін бұл жобаның маңызы зор. Бүгінде Бесқарағайда 6 спорт секциясы жұмыс істейді, 7,5 мыңнан астам адам тұрақты түрде дене шынықтыру және спортпен айналысады. Жаңа жүзу бассейні іске қосылғаннан кейін балалар мен жастардың спортқа қызығушылығы артып, ересектер үшін де салауатты өмір салтын ұстануға кең мүмкіндік тумақ. Жергілікті билік өкілдерінің айтуынша, спорттық инфрақұрылымның дамуы аудандағы бұқаралық спортты жаңа деңгейге көтеріп, елді мекен тұрғындарының бос уақытын тиімді өткізуіне жол ашады. Жүзу бассейні тек спорттық жарыстар өткізуге ғана емес, сондай-ақ сауықтыру шараларын ұйымдастыруға да қолайлы болады деп күтілуде.