Атырауда колледж студентін әжетханада соққыға жыққан

Атырау облысының Индер ауданындағы колледжде оқушыны соққыға жыққан жағдай расталды. Оқиға 31 желтоқсан күні таңертең оқу орнының әжетханасында болған. Жәбірленушінің туыстарының айтуынша, студенттің беті мен кеудесіне бірнеше рет соққы тиген. Мардымды көмек көрсетілмеген: колледжде сол сәтте медбике де, психолог та, куратор да болмаған. Бұл туралы Todayinfo ақпарат агенттігі хабарлайды. Оқушы алған жарақатына қарамастан, екі сағаттай колледж аумағында жүрген. Алайда жедел жәрдем шақырылмаған. Полицияға да кейін хабарланған.

Полицейлер оқиғаға қатысты қандай шара қабылдады?

Атырау облыстық полиция департаменті оқиға жөнінде түсініктеме берді. Қазіргі таңда бұл факт бойынша қылмыстық іс қозғалды. Күдікті тараптағы жасөспірімдер полиция бөлімшесіне жеткізіліп, олар ювеналды есепке қойылған. Қақтығыстың себебі ретінде жай ғана дәптердің себеп болғаны айтылып жатыр. Кәмелеттік жасқа толмаған жастардың қатысуымен болған бұл оқиға, білім беру ұйымдарындағы тәрбие жұмысын қайта қарастыру қажет екенін көрсетеді.