Астанада Орталық дәлізді дамытудың 2026 жылға арналған егжей-тегжейлі жоспары бекітілді. Қазақстан, Қытай, Түркия және Еуропа елдерінің теміржол ведомстволары мен көлік компанияларының басшылары Каспий арқылы транзитті жылдам әрі ашық ететін жаңа жұмыс шарттарын келісті, деп хабарлайды inbusiness.kz тілшісі ҚТЖ баспасөз қызметіне сілтеме жасап.
Негізгі өзгеріс – жүктерді қағаз жүзінде сүйемелдеуден толық бас тарту. Тасымалдауға қатысушылар цифрлық қолтаңбаны қолдана отырып, электронды құжат айналымына көшеді. Енді маршруттағы барлық елдердің кеден органдары деректермен тікелей нақты уақыт режимінде алмасады. Бұл шешім контейнерлердің шекараларда тұрып қалу уақытын түбегейлі қысқартуы тиіс.
Бекітілген кестеге сәйкес, биылғы жылы ғана Қазақстан аумағы арқылы Қытайдан 600 контейнерлік пойызды өткізу жоспарлануда. Мұндай ағынды қамтамасыз ету үшін Каспийдегі порттар мен терминалдардың жұмысы қайта қаралады – олардың технологиялық процестері жүктерді тиеу кезіндегі «тар жерлерді» жою үшін синхрондалады.
Кездесуге төрағалық еткен «Қазақстан темір жолы» ҰК АҚ басшысы Талғат Алдыбергенов қабылданған шаралар Қазақстанның Азия мен Еуропа арасындағы негізгі байланыстырушы буын ретіндегі позициясын нығайтуға бағытталғанын атап өтті.
