Парақорлар елі: биыл жемқорлықпен ұсталған басшылардың саны көбейген

Қазақстанда осы жылдың жеті айының қорытындысы бойынша 1,2 мың жемқорлық қылмысы тіркелген. Бұл өткен жылдың қаңтар-шілде айларымен салыстырғанда 8,1%-ға көп. Мәселені пара берумен шешкісі келетіндердің де саны аз емес, деп хабарлайды Todayinfo агенттігі. Жасалған қылмыстардың үштен бірі, яғни 364 жағдай пара берумен байланысты. Кең таралған жемқорлық қылмыстарының арасында пара алу (249), сеніп тапсырылған бөтен мүлікті иемдену (210), алаяқтық (143) және лауазымдық өкілеттігін теріс пайдалану да (137) іс тіркелген.

«Сыбайлас жемқорлықпен байланысты қылмыстар үшін көбіне әкімдіктер мен олардың құрылымдық бөлімшелерінің қызметкерлері сотталған. Сонымен қатар ішкі істер органдарының көптеген қызметкері, ауыл шаруашылығы, төтенше жағдайлар, денсаулық сақтау және қаржы министрліктерінің қызметкерлері де бар», - деп жазады Finprom.kz.

Биыл 7 ай ішінде 933 қазақстандық жемқорлыққа барғаны үшін күдікті деп танылған. Бұл өткен жылға қарағанда 13,4 пайызға көп. Соның ішінде 548 адам сотқа тартылған. Сондай-ақ, үнемі сарбаздары суицидке баратын Қорғаныс министрлігінің 6 қызметкері, шекара қызметінің 4 қызметкері сотталған. Лауазымдарын асыра пайдаланып, жемқорлыққа барған үш судья, екі әкім де түрмеге кеткен.