Назарбаевтың немересі бүкіл адамзаттың рухани тәлімгері болуды шешті

Фото: sparkofsouls.com Нұрсұлтан Назарбаевтың немересі өзін рухани тәлімгер деп жариялап, қозғалыс құрды, деп хабарлайды Todayinfo.kz ақпарат агенттігі. Spark of Light сайтының мәліметіне сәйкес, бұл қозғалыстың негізін қалаушы – Дариға Назарбаеваның ұлы, Қазақстанның бұрынғы президенті Нұрсұлтан Назарбаевтың немересі Нұрәлі Әлиев. Ол өзін рухани тәлімгер ретінде таныстырады. Сайтта Әлиевтің рухани тәлімгер ретіндегі қызметі адамдардың санасын жоғары деңгейге көтеруге көмектесетіні айтылған. "Нұрәлінің жұмысы нақты миссияға негізделген. Мақсаты адамзаттың санасын жоғары деңгейде ұғыну, айқындық пен ішкі үйлесімге көтеруге көмектесу. Сонымен қатар адамдарға өз болмысының шынайы мәнімен қайта қауышуға, саналы өмір сүруге және әлемге маңызды ықпал етуге жәрдемдесу. Адамзат қазір үлкен рухани өзгерістер кезеңінен өтіп жатыр. Осы уақытта оның басты мақсаты – адамдарға өз өмірлік мақсатын түсінуге, санасын кеңейтуге және жоғарырақ деңгейдегі сананы қабылдауға көмектесу. Ол үшін бағыт-бағдар беріп, пайдалы құралдар мен өзгеріске жетелейтін тәжірибелер ұсынылады. Бұл адамдарға өзгеріп жатқан әлемде өз жолын анық табуға, өмірдің мағынасын тереңірек түсінуге және ішкі үйлесімде, саналы әрі мақсатты өмір сүруге мүмкіндік береді", – делінген сипаттамада. Нұрәлі Әлиев бұрын мемлекеттік құрылымдарда жоғары қызметтер атқарған. Ашық дереккөздерде ол өзін кәсіпкер ретінде көрсетеді. 2007–2008 жылдары "Нұрбанк" директорлар кеңесінің төрағасы болған. 2013 жылғы желтоқсаннан 2014 жылғы желтоқсанға дейін "Транстелеком" АҚ президенті қызметін атқарды. Сонымен қатар Астана қаласы әкімінің орынбасары болып жұмыс істеген. Ол бұрынғы Орталық сайлау комиссиясының төрағасы Берік Имашевтің қызы Аидаға үйленген.