Алматы циркінің әртістері Гиннестің рекордтар кітабына енді

Алматы мемлекеттік циркінің өнерпаздары Батыр Жанұзақ пен Марлен Маратов Италияның Милан қаласында өткен Lo Show Dei Record халықаралық шоуында өнер көрсетіп, Гиннестің рекордтар кітабына енді.  Бұл туралы Todayinfo ақпарат агенттігі хабарлайды. Олар «Басында қолымен тік тұрған адаммен бірге сатымен ең жылдам көтеріліп-түсу» номинациясы бойынша ерекше трюкті жарты минуттың ішінде орындап, әлем жұртшылығын таңғалдырды.

 «Бұл — біз үшін ұмытылмас сәт болды. Біз бұл қойылымға көп уақыт бойы дайындалдық. Ал бүкіл зал тұрып қол шапалақтағанда алған әсерімізді сөзбен жеткізу қиын. Бұл рекорд — біздің еңбегіміздің, бірлігіміздің және цирк өнеріне деген сүйіспеншілігіміздің айғағы. Бізге сенген барша жанкүйерлерімізге алғыс білдіреміз», – деді Батыр Жанұзақ пен Марлен Маратов.

Бұл жетістік — қазақ циркі өнерінің халықаралық деңгейде мойындалуының айқын дәлелі. Жерлестеріміздің рекорды қазақстандық цирк өнерінің шекарадан асып, әлем сахнасында жоғары бағаланатынын көрсетті.